भर्ना नै नभएका व्यक्ति स्ववियु सभापति

अघिल्लो चैत्र ५ गते कैलालीको घोडाघोडी नगरपालिका १ सुखडमा रहेको राष्ट्रिय कलेजमा भएको स्ववियु निर्वाचनमा अनेरास्ववियु र नेविसंघको संयुक्त गठबन्धनका उम्मेदवारलाई अखिल क्रान्तिकारीका सुन्दर गौतमले भारी मतले हराए ।
एमाले र कांग्रेसका भातृ सङ्गठन मिलेर निर्वाचनमा होमिदा पनि माओवादीको भातृ सङ्गठनबाट उम्मेदवार बनेका गौतमले ९७ मतले संयुक्त प्यानलका उम्मेदवारलाई हराएका थिए । दोस्रो बनेका अखिल समाजवादीका माइकल चौधरी ९२ मतले पराजित भए ।
गठबन्धनलाई तेस्रो बनाएर भारी मतले विजयी भएका गौतम अन्ततः फर्जी विद्यार्थी भएको खुलेको छ । उनी अघिल्लो कार्यकालमा पनि स्ववियु सभापतिमा निर्वाचित भएका थिए ।
दोस्रो पटक उम्मेदवार बन्नु भन्दा पहिले गौतमले राष्ट्रिय कलेजमा भर्ना नै नगरेको खुलेको छ । स्नातक तह पास भइसकेका गौतमले स्नातकोत्तरमा भर्ना नभएरै स्ववियुको उम्मेदवार बनेको देखिएको छ । भर्ना नै नभएका व्यक्तिलाई भर्ना भएको भन्दै भर्ना रजिस्टरमा उनको नाम राख्न स्वयं कलेज प्रशासनका केही कर्मचारीहरू संलग्न थिए ।

यमुनाको लेजर फाइल 

स्नातक पहिलो वर्षमा अध्ययनरत यमुना बोहराले २०८१ फागुन १३ गते भर्ना बापतको रकम १६६\११२४३ नम्बरको रसिदमा तिरेको देखिन्छ । तर, भर्ना नै नभएर उम्मेदवार बनेका गौतमलाई जोगाउन क्याम्पस प्रशासनका केही कर्मचारीहरूले सोही नम्बर सार्वजनिक गरेर गौतमले भर्ना गरेको भन्दै किर्ते काम गरेका थिए ।

यमुनाको पैसा तिरेको रसिद 

स्ववीयु निर्वाचन प्रक्रिया कै बेला फर्जी विद्यार्थीको बहस सुरु भएपनि गौतम भने त्यसमा नमुछिएको जस्तै देखिएका थिए । क्याम्पस प्रशासनकै लेखापाल लक्ष्मण चौधरीले भर्ना भएका विद्यार्थीहरूको नाम राख्ने लेजरमा गौतमको पनि नाम चढाएका थिए । प्रमाणको लागि रकम तिरेको भन्दै फर्जी रसिद नम्बर तयार गरेर लेजरमा राखिएको थियो ।

गौतमको फर्जी लेजर

स्ववीयु सभापति निर्वाचित भएको करिब एक डेढ महिना पछि गौतम फर्जी विद्यार्थी रहेको र किर्ते प्रमाणहरू तयार गरेको खुलेको हो । स्रोतका अनुसार गौतमले केही प्राध्यापकहरूलाई आफ्नो भर्ना गरिदिन र शुल्क समेत तिर्न भनेका थिए । तर, गौतमले भनेका व्यक्तिले तोकिएको समयसम्म रकम दाखिला गरेर भर्ना नगरेपछि उनको भर्ना छुटेको थियो । त्यसपछि स्ववियु नजिकिएपछि कर्मचारीहरूले नै फर्जी कागजात तयार गरेका थिए

के भन्छ क्याम्पस प्रशासन ?
क्याम्पसमा भर्ना नभएर स्ववियु निर्वाचन जितेको विषयमा अहिले सबैले आफ्नो कमजोरी स्वीकार गरिसकेका छन् ।
क्याम्पस प्रमुख देवेन्द्र कुमार प्रसाईँले आफूले पहिले थाहा नभएको र अहिले विद्यार्थी भर्ना नभएको बारे जानकारी पाएको बताए ।
स्ववीयु निर्वाचन संयोजक प्रभात बोगटीले मतदाता नामावली माग गरेको र लेखा शाखाबाट दिएको नामावली अनुसार अन्तिम नामावली प्रकाशन गरेको जानकारी दिए ।
‘२१ गते लेखा शाखाबाट मतदाता नामावली प्राप्त गरेका थियौँ । हामीले एक- एक हेर्ने कुरा हुँदैन । हामीले त्यहाँबाट आएको नामावलीलाई नै मान्ने हो ’ उनले भने ‘ त्यही नामावली अनुसार २७ गते उम्मेदवारी दर्ता गराएका हौँ ।’
लेखापाल लक्ष्मण चौधरीलाई गौतमले इन्ट्रान्समा नाम निकालेको बताउँदै आफै पैसा हालेर भर्ना गरिदिन भनेका थिए ।
‘ चुनाव आयो । मेरो नाम चढाइदिन भन्नु भयो । विना रकमको हुँदैन भने । रकम दिनु पर्छ , रकम नभइकन भोलीका दिनमा मैले जवाफ दिनु पर्छ सरले पनि त दाखिला गरिदिनु प¥यो ’ लेखापाल चौधरी गौतमलाई भनेका थिए ।
गौतमले आफूले भर्ना रकम पछि दिन्छु भनेर भर्ना गर्न आग्रह गरेको तर, भर्ना समय सकिँदासम्म पनि बैक दाखिला गर्नु पर्ने रकम नदिएपछि किर्ते रकम दिएको रसिद बनाएको देखिन्छ ।
‘जुनसुकैको हाल्दिनुहोस् भन्नु भयो । मैले त्यसपछि कसैको नाम नहेरेर अन्दाजी रसिद नम्बर हाल्दिएको हुँ’ उनले बिल ठेली देखाउँदै भने ‘ यहाँ विल ठेली छ । यही वर्षको हाल्नु पर्छ पुरानो हाल्न मिल्दैन । ’
उनले आफ्नो नियत यस्तो नभको तर, गौतमको दबाबमा फर्जी काम गरेको स्वीकार गरे । आफू यसमा कुनै पनि जबाफदेही नहुने भन्दै उनले गौतमलाई सबै जिम्मेवार आफै हुनुहोला भनेका थिए ।
सुरुमा रकम नतिरेसम्म भर्ना नहुने बताएका लेखापाल चौधरीले पछि गौतमले रकम नबुझेरै अरूको भर्ना भएको रसिद नम्बर गौतमको हो भन्दै भर्ना रजिस्टरमा नाम चढाएका थिए ।
यता सभापति गौतमले आफूले भर्ना गरिदिन भनेको तर, भर्ना भए नभएको जानकारी नलिएको बताएका छन् । उनले आफूले इन्ट्रान्स दिएको र डकुमेन्ट बुझाएको दाबी गरे ।
‘यस विषयमा म अनविज्ञ छु । कसको बिल नम्बर हालियो, के हालियो ’ उनले भने ‘मैले भर्ना गरिदिनुहोस् अहिले पैसाको सटेज छ केही दिनमा तपाइहरूलाई उपलब्ध गराइदिन्छु भनेको थिए । ’
स्ववियु निर्वाचन सकिएलगत्तै फर्जी विद्यार्थी मतदाता रहेको भन्दै जिल्ला अदालत कैलालीमा मुद्दा परेको थियो । उक्त विवादमा गौतम भने मुछिएका थिएनन् । तर, अहिले उनी पनि फर्जी भएको पुष्टि भएको छ ।
स्रोतका अनुसार अदालतमा  मुद्दा परेपछि सभापति लगायत निर्वाचित पदाधिकारी तथा सदस्यहरूको शपथ भएको छैन । शपथ नहुँदै सभापति नै फर्जी भएको खुलेको छ । यसले यहाँको स्ववियु निर्वाचन माथि नै प्रश्न खडा गरेको छ ।
भर्ना नै नभएका व्यक्ति स्ववियु सभापति भएपछि अहिले क्याम्पसमा खैलाबैला मच्चिएको छ । यस विषयमा क्याम्पसले सर्वदलीय छलफल गर्न विद्यार्थी नेताहरूलाई बिहीबार बिहान ८ बजे बोलाएको छ ।
‘स्ववीयु निर्वाचनको सिलसिलामा देखिएका केही समस्याहरूका विषयमा छलफल गर्नुपर्ने भएको हुँदा स्ववियु निर्वाचनको लागि यस कलेजमा दर्ता भएका सम्पूर्ण विद्यार्थी सङ्घ सङ्गठनका प्रतिनिधिहरूलाई उपस्थित हुन अनुरोध गरिएको छ’ क्याम्पस प्रमुख देवेन्द्र कुमार प्रसाईँले जारी गरिएको  सूचनामा  उल्लेख गरिएको छ ।